Soos iemand in 'n droom
wat aan nagskimme en
verligte ster kandelare glo
die man in die maan saans
met n soen op die wang groet
sterrekettings een vir een inryg
is die wêreld wat ek aan glo
Soos iemand in 'n droom
wat op sagte boepenswolke
dans, tiekiedraai en swaai
in die skadu van die skugtermaan
wegkruip teen die oë van die
wêreldse realiteit en seer
is die uitkoms waarop ek wag
Soos iemand in 'n droom
wat die nag deur ander oë sien
vir wie die blink sterre diamante word
die maan n groot pot fyngoud
die donker blouwolke safiere en
helder blink akwamaryn
die sterre konstellasies groot
swierige aansteek spelde
dis die wêreld waarvan ek droom
Soos iemand in 'n droom
wat aan eendag se more glo
weet die trane teen my wang is net
vloeibare kristalle reën
dat God my lewe weer sal seën
die kleure van die reënboog
een vir een in my lewe inweef
dat my more weer mooi sal word
dit is die lewe wat ek voor hoop.
