so het ek gestap
van geroeste Swakopmund
tot lowergroen woude
van Sabie en Knysna
deur die hitte van die Boland
tot in die grys kontras
van die stad waar ek woon
my wêreld
het weer gelewe
ystergordyne
en rou steen mure
is afgebreek
en verwerk
ek het gestap
met my kamera in hand
gesoek, gegrou
en soms met bitter seer
ook geleer
in die onthou
by kruispaaie
blindings geraai
waar die dag my sou vat
want ek wou lewe
vir nou
in my lens
het ek lewe vasgevang
in my kop
my hart
en in my donker laatnag drome
storm stom
het lewe aangerol gekom
deur my jongseun dae
nog maar net 'n snuiter
nattigheid agter die ore
maar met die waagmoed van ‘n beer
lang jare later
staan ek op-die-plek-rus
en bekyk die lewe
uit ‘n heel ander hoek
die seun in my is plek plek weg
maar steeds in my bloed
van kontinent na kontinent
het my vlerk wyd gespan
verken
gesoek
geleer
en gevra
die monsoon van die Ooste
sneeu in Skotland
die drukkende ekwator
tot in die ysbyt van die hoëveld
geleer
gelewe
gesien
gevoel
groot geword
steeds klein in dieselfde asem
vandag vra ek ander vrae
soek ander paaie
leef anders
kyk anders
dink anders
sien anders
voel anders
maar aan die einde van die dag
is dit steeds net ek
soos ek die lewe
deur my winter-lens aanskou.
BennyB
©09/05/2011 Barend Booysen
