Die Paasfees gees wandel gewyd
deur hierdie vissersdorp se strate
waar dié sonder viskarre gesuip
teen lamppale leun,
waar bloutrein-deurdrenkte moeders
sjokolade eiers in kerm kinders
se smoele stop om trane en snot te keer.
My ma sou weer sê ..'' Hierdie is die
tussen-in tyd van die jaar my kind,
met 'n oordaad tussen-in weer.
Jy moet halfmou truie en bloese dra
vir al hierdie tussen-in dae ''
Nou is tyd vir bak en brou, vir opgaar
want winter is aant gluur, hy plan om
weer 'n ewigheid te duur.
'' Is jy voorbereid my kind ? ''
Ek tuur oor Somer se hangskouer
en weet my lag in son was veel en gul,
daar is 'n swetterjoel meer lagplooitjies
om my oë gehul.
'' Nee ma, my spens is leeg, maar ek
oorleef op ys en wind en mis,
op krummels wat op sy tafel te vinde is.''
'' Ek ken van survive against all odds ma,
ek vra niks van niemand nie ma,
net 'n kans om my eie vrae aan die Kaap van
Storms te vra ''
Tuis maak ek reënboog broodjies vir die
kinders met volop soet en kleur en geur,
sny laaste stukkies van die son
sodat hulle knus is as die yswinde kom.
Ek gaan sit en skryf 'n storie oor die lewe
wat onderlangs van seer en droefheid bewe
maar ek woord 'n muur van groot groot hoop
eer voorbodes my van sprankel stroop.
Toe ek later wit bedlinne kraak
buig ek 'n skewe droom nog krommer.
Hierdie is net nog een nag van vele
en die mensdom ken slegs ten dele soos ek,
maar dis genoeg.
Vooraf kennis oor winter sal ons dryf
na raserny.
© 2011 Almarie Truter