In malse lande vol groen en goud
gebuigde hoofde vol beloftes van
lewe en hoop groeiend op my
in vier seisoene vind ek jou,
Jou oë is die hemelse blou
wat die vol verwagte wolke
in hulle sagte voue vashou.
Die glinsterstrale van die son
het jou glimlag vasgevang
stuur hom na my wanneer
ek so eensaam na jou verlang.
Jou liefde groei soos 'n rooi
papawerblom in die woestyn
kosbaar soos geen ander
trotseer wind en weer
niks sal dit ooit verander.
Jy maak my warm soos die
somerson laat my soos 'n
goudgeel sonneblom groei
tot ek my oes van liefde
in jou skoot uitgooi.
Ook trek jy soos 'n herfswind
deur my omgee en liefdeslyf
verf kwistige hale helder
kleur strepe deur my verlang
strooi vlaag vir vlaag goud
en bruin genades om my voete
'n kombers om my warm te hou.
Bietjie vir bietjie stroop jy
my kaal sodat ek weerloos
in jou seisoen staan met
gestroopte emosies wat
oral op my leë lyf uitslaan
jy trek soos voorwinter deur
my bang lyf vir dit wat wag,
in die wind hoor ek jou koggellag
as jy eenkant na my staan en staar
wetend ek is eintlik weerloos
teen jou.
Jou koue wasem asem blaas
genadeloos in die holte van my nek
kan my nie teen jou verweer
die besluit is nie myne om te neem
jy vat wat jy wil hê sonder om
een enkele keer vir my te vra,
ek heeltemal versteen, verstom
onder jou wit ysjas wat jy
styfpassend om my vou.
Jy pers en mergel elke greintjie
lewenlus en vreugde uit my
eens warm omgee lyf
gee nie om oor die pyn wat
diep binne in my seerkry lê
spierwit vasgeys.....
wagtend dat jy weer jou rug
weg sal draai van my
jou wit gesig sal verdwyn
en ek weer in die holte van
n eens beloofde warm
liefde sal kan lê.
In verstarde verdwaasdheid
jou koue vingers nog nie vergeet
word ek van iets in my bewus
wat n herinnering aan jou in
my koue verlanglyf wakker maak
die gevoel hoe jy teersag aan
my als verloor kaal lyf raak,
soekend tas jy oor my rond na
uitgeswelde botsels wat soos
hoendervleis op my kaal lyf uitslaan
dis waar jy die groei van my hart kry.
Teer het ek die lewe in my oopgevou
niks vir my selfsug teruggehou
met oorgawe gebot en geblom
tot jy my kom pluk om my in
hierdie blomseisoen by jou te hou.