Vier siesoene

Herfs
Herfs is wanneer blare swerf
en op die lui herfsaarde sterf,
maar saam met dood kom ook altyd lewe -
die plan is ver bokant smart verhewe.

Winter
Dit is die beperktheid van die lig wat aan
die winter my die ergste vang en my moed betig -
die winterwind waai die karige skerfies sonlig
dwarsdeur Hitchcock takke tot anderkant die koue maan.

Lente
My lief is die eerste lentereën
en die wolk majesteit se gulde seën.
Wit soos wolk sketse is dit teen die blou
voor kleurkwas liefde vloei oor doeke van jou.

Somer
Lug-spoke dans daar op die dak,
dans-dans op elke stukkie sink en teer -
gaap-gaap kraaie, trap-trap miere tot die son sak,
en tot Herfs ons red, brand ons more weer.

© Torm 2011

In my opinie, n baie goeie beskrywende gedig Torm. Hier kan mens nie kies watter seisoen nou eintlik die mooiste is nie.

Haai ek het die een gemis. Baie dankie, Claira Summers !

Middag Torm,

Elke seisoen is deur jou ewe goed uitgebeeld. Jou beskrywing van elke een bring n gevoel van bekenheid by my op waarmee ek onmiddelik identifiseer. Jou reimskema en die manier hoe jy dit afwissel lees vir my lekker. Ek het waardering vir hierdie werk van jou!

Voorstel: Miskien sou ek die"en en die" uit die eeste drie strofes (tweede reel) gelaat het.

Herfs is wanneer blare swerf
op die lui herfsaarde sterf,

Dit is die beperktheid van die lig wat aan
winter my die ergste vang en my moed betig

My lief is die eerste lentereën
die wolk majesteit se gulde seën.


Subjektief my gevoel maar dit werk net beter vir my. Wat dink jy?

SWERWER

Swerwer, ek dink jy is in die kol. Ek verbeel my selfs ek wou dit al doen kort na die plasing lank gelede en toe't ek weer vergeet. Maar dalk is dit net omdat die verandering so maklik op die oor val.
Kyk gerus ook na my nuwe "Jare van verandering" want ek is blykbaar vir 'n verandering in the mood vir struktuur (nie my gewone element nie.)