Lente...

wanneer amber-gloed sonnetjie skyn
‘n belofte van warmte word nader gewink
warmte wat die koue sal laat weg kwyn
…en elke bedroefde gedagte gesink in winter harte
laat verdwyn

‘n nuutwording van aards grond
vrolik vlieg haastige bytjies rond
om nektar uit pas gebore bloeisels te vang
vanuit elke boom kom harmonieuse gesang

ou akker-reus pronk weer trots
bedek met nuut vol-bos groen blaar prag
daar’s weer vrolikheid wat in hom rots
wat skuil in ou akker – veilig dag en nag

‘n plaat van kleure en geure
wat elke sintuig bevredigend verbly
natuur maak weer wyd oop haar deure
na ‘n horison blomme net waar die oog heen gly

‘n ontploffing soete parfuum
sweef deur bloue hemel
in neuse op geneem
en gestoor diep binne-in die hart

in elke stappie ‘n vrolike wip
‘n opgewonde glimlag op elke lip
in elke oog ‘n vonkelende glans
in elke tree sy eie unieke dans

met oë effens gesluit
raak ek stil vir ‘n oomblik
word ek vasgenael in hierdie oomblik
‘n oomblik in tyd
waar ek elke sintuig bevry

elke sappigheid
wat voor my afspeel
met waardering geniet
en besef
met nederige dankbaarheid
elke seisoen
getrou op sy tyd
en vir nou
is dit weer heerlike lente
die winter
is vir eers verby…

© I.Q
05-09-2011
Alle regte voorbehou / All rights reserved

Ai, hierdie is pragtig. 'n Uitgerekte kommentaartjie gaan hier net oneer aanrig. Werklik pragtig.

Baie baie dankie! Ek waardeer opreg!

ek stem Rudi, ek hou van jou beskrywing en die woorde wat jy hier gebruik het, hou so aan

Dis besonders ja. Dink dis goed gedoen. Wonder net oor jou strofe 7 se reël 1, “moet oë effens geluit”. Is dit ‘n uitdrukking wat ek nie ken nie, of ‘n klein tikfoutjie? Wonder nou. Sal graag daardie uitdrukking wil baasraak as dit een is wat ek nie ken nie.

Baie dankie Enid en Nico - ek waardeer julle opmerkings...
Nico - moet "met" wees, nie "moet" nie...baie dankie dat jy dit vir my uitwys...sal dit reg maak! Hehe soms werk die vingers so 200km / h vinniger as die brein