laaste anker

nie eers sugtend nie,
beheerste, algehele oorgawe;
so stap jy,
onsiende,
blind!
maar gevoelloos?,

vir ‘n oomblik proe jy dalk die sout;
was daar trane? ek glo daar was;
hoe groet mens sonder
‘n storting van emosie
wanneer jy op die punt staan
om oor te hel, daardie kant toe

deure wat slegs oopmaak na binne
en selfs die sagste geklop kan hoor;
jou plekkie berei
wyl jy nog aarsel,
en dan, voet aan wal sit,
aanstap, onsiende, blind.

fyngemaalde skulp word sand
- so ‘n swarterige, besmette,
hard-korrelagtige-soort sand;
wat ongemerk versag,
klam die gety se vordering
in natgrond streep

in ‘n oomblik, of was dit minute?
heet sy jou welkom, omgolf sy jou;
sout en trane vul die leemtes van jou wese,
sodium en chloried bevestig die daad
in ‘n oomblik se gehele besef,
maar, jy draai nie om nie,

die huis is waar die hart is
maar jou hart was leeg,
of dalk,
so vol van die drek
dat jy hom wou ontsmet
met ‘n laaste asemteug.

© (02.06.2011) Rudi Prinsloo, Alle regte voorbehou

Rudi,sy het baie emosies getoon in haar werk en soos ek ook hel baie probleme met ons Pa's, ha (ongelukkig), een ding is verseker sy wragtag meer guts as ek...as ek so iets moet doen, sal slaappille die maklikste wees, ek hou van jou begrip van haar emosies in die laaste minute wat jy hier vaspen, dit moes nogal so-iets gewees het.

Ken ek nie daardie verlorenheid nie...daardie oomblik van huiwer op die drumpel van sout of soet...van bitter hel of hemel....daardie vele voorlaaste ure van diepe smart.....om my enkels het ook al soutigheid gespoel en my in genooi...wou ek my arms om alg en wiere gooi, net om nooit weer te onthou.....

Jou slotreël tref my vol in die buik!
Puik !

ek kan nie meer se as wat reeds gese is nie jou werk getuig van emapatie met die heldin,.......... puik werk rudi

Enid, Ammie, Ronel - my waardering vir julle gawe kommentaar kan ek nie genoeg verwoord nie. Met Ingrid spesifiek voel ek dat haar lewe en einde soms onnodig verromantiseer word - ek het probeer wegskram daarvan en my probeer verbeel hoe dit in haar gemoed sou gegaan het. Mens sal egter seker nooit regtig weet nie.