'' Dans met my ''

'n heuning melodie druip teen growwe bas,
refrein binne my -
'' Dans met my ''

gestol teen skanse van my vesting
braille ek jou fluistering wat kleef
aan bloeiskedes van my labirint tuin,

eien ek jou buitelyne teen mure
van my halfweghuis,wyl ek my hart
se vrese en donders demp -

steeds voelbaar my diafaan hunker
na iemand
wat die kalligrafie van my naam verstaan;

jy wink en sug laag in hol gange
van my ontruimde niemandsland
en ek gee huiwerig my hand
om teen skemer (saam met jou)
wankel treë op die dansbaan van die lewe te gee,

met steeds 'n ewige heuning refrein
wat resoneer binne my -
jou lippe wat prewel '' Dans met my ''


© 2011 Almarie Truter