Duiwelsbrood mislei

jou woorde laatherfs in kleine trosse
kaal
triviaal
en ek wonder of ek my hart
verkeerde kant na bo gedop het
toe ek swikvoet teen rotswande gestruikel het,
meer geuiter het as wat ek moes ?
(die trol onder die hangbrug eggo steeds
my rebelse krete)

toe ek braaf stuwende die steilte geklim het
gepor deur die applous van kranse en boompaddas,
wilde sampioene gestrooi het op aarde
wat nog nie deur gereën was nie

die syaansig van jou afstand gooi blou skadu's
in ons grys vallei
nou swyg ek ook -
is blou lewe of dood
is kampernoelie gif of brood ?

'n volmaan bars uit nate van opgekropte weet,
vries teen voorwinter wat kraak in leë nagte
wat my nou omring
waar ek hande vol oktawe poog
om 'n moppie sonder deuntjie
in jou dennebos te sing

Tafelberg krimp by die uur
en ek kan skaars jou huis teen die hange eien -
waar jy grot tussen nuwe rot en bas,
sukkel om my droom
in jou werklikheid te pas

dalk moes ek eerder paddastoele gedroog het
met gebottelde son uit jou spens,
die berg vermy het tot winter se geknaag
aan dun dae verby is.


© 2011 Almarie Truter