ons het hierdie son-seisoen te min
oor rotse geklouter, ek en jy;
te skraal was ons bewe streling
tydens soel nagte vol sweet en seks
ons het die hitte van dae soos
origami-vlinders gevou, losgelaat
om deur bleekhemel-ure te sweef
té vêr buite ons bereik
ek en jy het voetpaadjies gekloof
en beloof om saam die Grysstrandkiewiet
se nes te bespied vir die eerste
porseleinkoppies om uit te breek,
maar het vreemd daarvan vergeet
iewers tussen bokkom-bossies tel en mekaar
se gedagtes deur lugspieëlings te lees,
het ek en jy gefaal om somer se blinkoog pitte
uit sopsap waatlemoene te spu
en nou ?..nou spoel die nadraai van 'n
swemseisoen klein jobbelbranders om ons enkels
en die fynknyp happies van koue seestrome
vries vuur teen ons bronstige lende
(vrees nie my lief, ek sal somer 'n handvol nagte langer strek)
© 2011 Almarie Truter