die hek lê toe
al die tyd sommer oop
die grondpad skep kontoer
in die middelbaan se opgerysde stuk
(ʼn stokou bakkie het seker in die na-reën modder daar geloop)
vir ʼn onverwagse Van Gogh meesterstuk
van onder voet tot die horison daar doer
in kommen daisies perfek rondgestrooi
soos lawwe geel-en-oranje
sterre
baldadig uit die hemel uit gegooi
party reeds afgepluk
maar dit saak nie maak nie
saam veldblomprag bruis dit soos sjampanje
ʼn verkwikking
hier in hierdie hel
gemaak deur gevalle engele
sterre
waak versigtig oor die nag
voor elk’ gesiggie soggens weer oopvou
skyn soos sonlig van onder deur die dou
en ek hoop ek vind jou
voor hierdie paar oranje dae verby vlug
en die dapper daisies voor die son swig
maar voor die gevalle sterre kompos word
- soos verskietende sterre spoke
van die kosmos word -
vou elk’ gesiggie versigtig oop
rondom ʼn handjievol saadjies
van hoop
© Torm 2011