Aeolus*

Waai wind,
waai!
waai in jou
malle moer in!

knak haar rug,
verpes haar takke,
stroop haar bas
en
skilfer
haar huid

hier onder
tussen die harde-gras,
ja, hier by haar wortels
sommerso bo-gronds langs
lê my saad
en ontkiem

hier regs van haar;
waar tak en blaar
geen skuiling bied
teen reën en son

wel sý mag jou die rugkant bied
(sy beur mos links oor
jou alewige gewaai)
maar ék, ék maak gereed
om
regop te groei

Waai!!!
- hiér lê
gatvol saad
en ontkiem!

© (05.08.2011) Rudi Prinsloo
Alle regte voorbehou / All rights reserved

* Aeolus: Griekse
mitologiese heerser oor die winde