Oggend breek in gister se onthou
met ‘n warm groet wat sê
dat die donker grys van winter
die koorsang van lente
in ‘n oggend groet kom bevestig
lewe maak sy arms oop,
die bosveld ruik anders vanmôre
ek lewe
‘n hartklop anders as gister
asof ek uit ‘n lang winter hibernasie ontwaak
ek is dankbaar
vir ‘n oomblik vlerk-vlieg ek terug
deur my verlede
en raak ek stil vir die geleentheid
waar my oë
‘n wonderwerk kan sien ontvou
in elke ervaring groot of klein
in elke dag , maand en jaar
om te kon deelneem aan lewe
ek is dankbaar
my hart pols weer
soos ek blaai deur die prentjies
van die wat my lewe kon meemaak
vriend, familie en geliefdes
elke kennis of per toeval ontmoeting
iedereen se bydrae
tot my persoon in die hede
ek onthou van alleen grootword
ek onthou van swaarkry
my ma se glimlag
kleilat speel
die sorgeloosheid van kindwees
van Trompie
en ons bende-huis by fort Wonderboom
ek is dankbaar
ek onthou die seer van lewe
oorlog, taxi geweld
Kaspers in die townships
ou Suid-Afrika
se oranje, wit en blou
die Volkslied
en Nasionale Christelike opvoeding
eer jou vader en moeder
sodat jou dae verleng mag word
ek is dankbaar…is ek?
ek onthou en leef
’n droom van kinders hê
liefde wat ek so graag wou gee
die seer
in wete dat dit nooit sou wees
net nog ’n hoofstuk op ‘n blou-oranje horison
ek onthou en sal nooit vergeet
16 jaar saam met jou
ons begin
ons waag
ons verloor en wen,
jy het my gewys
wie ek was
die mens diep binne my weggesluit
maar deur lewe se kronkels en draaie
moes ook ons paaie skei
dankie Lize
dat jy help vorm het aan my
ek is dankbaar
my lewe was deurmekaar
in jare van my kluisenaars bestaan
om sonder weghol
my demone in die gesig te staar
opgee was geen opsie
net my skouers
wou nie meer my gister-laste dra
lewe se roulette
het aanhou draai
my geluk het bly ontwyk
moes vrede maak met gister se spook-bataljon
te lank wou ek als verander
te veel alleen probeer vermag
dit is van my verwag
ek moes regop staan
’n man wees
want ....cowboys don’t cry ?
ek moes vergifnis vra
voort bou op wat geluk sou bring
ek is dankbaar
en eendag
sonder vra
klop ’n engel aan my hart
sonder voorgee of pretensie
het sy voor my gestaan
my hart gelees
deur my oë gekyk
en verstaan
my kettings het gebreek
vreesloos vir wat kom
daardie oomblik was ek kompleet
en sou my antwoord voortaan altyd wees
ja
ek staan dankbaar
ons lewe het as een begin
sonder vrees
liefde sonder maatstaf
buiten om een te wees
vandag staan ek voor jou
Janet
en gee jou
my alles en wat kan wees
my hart en siel
vir die voorreg
om jou altyd lief te hê
ek is kompleet
ek is
BennyB
© 19/08/2012 Barend Booysen
