Lycanthrope

1591 het jy reeds geprooi
net om haar nou, hier,
in hede tyd en eeu te vind
as astrale maagd, wegloop vrou
'n kaalvoet kosmos-kind

jou spore in die waaskring van 'n vlasglasmaan
sirkel menig nag die rooikoors van haar drome

met jou beskonke trans
as jy maandronk
die blomme van haar rooswit vlees bekneus
welbedag die effek
op haar persblou gees

waar jy in kwartmaat skuil
in skadu's van middellande
eeue vêr van hier
maar met eerste volmaan-uur
deur glimpe van haar oë tuur -

as sy jou ruik en proe
in die polsing van haar bloed,
waansinnig na jou roep
haar alfa reun;

met belladonna wat môrevars in dageraad
nog aan haar lende kleef -
'n seker wete
dat jy hierdie tyd en eeu
steeds in haar lelielyf se kelke leef.


© 2011 Almarie Truter.