die eerste reën is ʼn baba
wat altyd laat kom
vir boere soms keisersnee
epiduraal
voorafgegaan deur wroeging -
soms al swanger sedert die vorige jaar -
maar agterna, altyd feesviering
vir dae lank sing Vleiloerie sy hart uit
vir swanger lug
vir wolkies wat weer teleurstel
soos eennagliefdes
totdat die regte ene kom
wit soos wol maar later
donker van diepte
dit sweet eers, dit ruik eers
dit belowe anders
sonder jou
sal klein groeiknoppies verstar
tot vaal hout sterftes
sonder jou
sal al die sade en spore en stuifmeel
verniet vermors word
sonder jou
sal die voëls se sang verstar
en in plat kroppe verdroog
sonder jou
sal die boklammers
nie kom bokspring nie
sonder jou
sal beloftes met wrang mondhoeke
begroet word (want wie weet tog regtig)
sonder jou
sal die stroompies anorexia kry
en wanhopig stol tot bruin, dan geel
en sonder jou
sal eers die water vervuil
en dan die lug, die liefde, die lewe
my lief is die eerste reën
die wolk majesteit se seën
wit soos sneeu sketse teen die blou
word dan doeke vir jou
waarop jy gulheid en goedheid
uitstort met verfdruppels soos reën
dit was, is en word my eerste seën
die eerste donder, in barendsnood,
lem skielik die wolke oop
daar is ʼn bietjie bloed -
stormwater bedelaar skuilings
weggespoel tot groter nood -
maar dis alles goed en groot
(eerste reën word altyd goed bedoel)
dit stort, versamel en loop
uit op die aand, vars en koel
soos op ʼn nuwe somerlaken
vèr spoel dit, en diep soos rou,
trane van blydskap plons
en voordat die lig verflou
prisma die druppels die lig vir ons;
wys die reënboog vir ons ʼn baken
dat Kersfees nie net ʼn belofte sal bly nie
dat verfrissing nie net ʼn droom sal bly nie
dat blomme nie net sade sal bly nie
dat selfs die eendaglelie sal blom
miskien selfs
dat liefde altyd weer sal kom
© Torm 2010
*************************************
ek praat nie van spottende stofnat druppeltjies nie, ek praat van ordentlike reën
soos in: die koöperasie se ploeë is skielik almal uitverhuur
