Kurkies, my gruwelooslike stokstertmeerkat !

Het julle geweet ek het ligjare terug 'n stokstertmeerkat as troeteldier
gehad?....Ek het hom as babatjie een vakansie van De Aar in die Karoo,
af saam huistoe gebring. Hom gekoop vir R2 by plaasvolk wat hom met 'n
stuk bloudraad om die nek, agter hulle aangesleep het in die stofpad. Ek
moes 'n spesiale permit kry om hom in Paarl se dorps gebied as
troeteldier aan te hou en natuurlik teen hondsdolheid laat inent. Sy
naam was Kurkies en was die mees koddige en verruklikste troeteldingetjie
onder die son gewees....STOUT...godsgruwelik stout, maar so beminlik en
liefdevol....Wat hy nie alles aangevang het nie!!!....giggel

Hoekom Kurkies?...Dinges ek weet nie, hy het net gelyk asof hy 'n
meerkat genaamd Kurkies moes wees, toe noem ek hom so, sien?...anyway

Hy was gruwelooslik!...Ek was sestien en baie baie hubaar toe hy my lewe
in gekriewel het...Die stroom van jong kêrels na ons huis toe was
lewenslank en my drie broers moes skofte wagstaan om hul enigste sussie
se kuisheid te beskerm...dinges!!...party poopers!...giggel...anyway

Kurkies het besluit hy sal as aflos dien as een van die broers nie
beskikbaar is vir ''diensplig'' nie. As die kêreltjie inkom was Kurkies
amptelik die verwelkomingskomitee...vol toertjies en stuitigheid, maar
laat die jongman nounet regs van my plaas neem op die rusbank, steek die
klein ''gremlin'' in sy gene kopuit...Het die dingesse gewoonte gehad
dat sodra die jongman se vlees aan my vlees raak, hy hom sal bevlieg en
aan die hakskene byt!..Erger nog, soms het hy gespring en die arme
ridder aan die skaamdele beet gekry...Phokket...het jy al gehoor hoe
breek 'n tiener seun se stem binne sekondes ?....Miemmie Coertzer se
dinges!!..,Hulle het oktawe gehaal wat Pawarotti soos 'n straatsanger
sou laat klink!...giggel...Hy het menige jongman se trots en selfbeeld
binne sekondes van hulle gestroop!...die klein wetter!!....

Ek is oortuig enkeles van die vryers se toekomstige bruide het erg skade
gelei in enige gesins-uitbreidings-idees wat hul met hul jong viriele
bruidegoms in gedagte gehad het en onverklaarbare letsels op dele wat
selde son sien moes baie vrae in die slaapkamer ontlok
het!....giggel..anyway

Nodeloos om te sê dat die aanloop van vryers drasties verminder het soos
die woord versprei het van die klein ''sedebewaker'' en ''shok-stok''
by die Maanwip se huis! Kyk, sestien en vry loop hand aan hand en
Kurkies was besig om my ''geboortereg'' van my te ontneem. Ek het geweet
'n pot lensiesop gaan nie hier as omkoop geskenk my hubare status
herwin nie. So ek maak toe 'n ''deal'' met Kurkies, Hy laat die
vryers-klonge se ''kroonjuwele'' met rus in ruil vir al die tjoklits wat
hulle vir my aangedra het. Dit was 'n wen-idee, want sien Kurkies was
'n soettand. Hy sou op 'n goeie dag die stok in sy stert verruil vir 'n
''soetbekkie''....giggel...anyway

Die string vryers het weer mooi begin aanteel en die voorraad
vry-tjoklits het verdriedubbel! Die klein hel was nog kieskeurig ook
gewees. Weens 'n oormaat van tjoklits het die kaartmannetjie voorkeure
begin ontwikkel. Net ''top-deck'' en ''aero'' het sy fancy getickle !!
Ek dink steeds Cadbury se verkope het drasties begin styg gedurende die
laat tagtigerjare en nou weet julle hoekom!!.....Dinges!! en dan was
daar nog Mev. Dominee se klein teef Jack Russeltjie wat se hitsige boude
vir Kurkies erg mooi was...maar wag, laat ek liewer nie daai
konsternasie openbaar nie...giggel

So het hierdie klein Karoo-goggatjie vele hoofstukke geskryf in my
lewensboek...sommiges skandelik en sommiges seer mooi! Maar hy was myne
en vir al sy lewensjare was ek en hy onafskeidbaar!

© 2010 Almarie Truter

Ja Almarie Truter,

Vir jou grafsteen sal hulle nie genoeg plek he om sinvol oor jou lewe te skryf nie. Al is dit hoe kripties en gekodefiseer sal daar n hele berg uitgekap moet word om daai opstel sinvol te kan skryf. Daar steek seker waarheid in die gesegde dat n troeteldier is die verpersoonliking van sy eienaar en dat 'die dier met tyd die karaktereienskappe van sy baas aanneem. skrikwekende gedagte as ek aan Kurkies nou staan en dink. Nee o dinges man waar loop my verbeelding nou met my rond? Ek wonder tog!

Dit gese is ek bevrees dat die Weskus of oorlaai is met mans met stemme wat klaarblyklik nog nooit gebreek het nie of die Weskus besit die wereld se vetste meerkatte. Daar is egter n ander moontlikheid, ek maak n afleiding van "ligjare terug", dat die manne se stemme nou bulder en dat hulle of jy die tekens van tjoklet oordadigheid toon.

Vraag is wie staan nou wag oor die manne se kuisheid en wie dra nou die tjoklets aan?




SWERWER

Ek het nou so lekker gelag oor al hierdie manewalesis wat plaas gevind het met hierdie diertjie van jou. Jou woordeskat is uit die boonste boeke, jou humorsin aan woorde trek my erg. Sterkte met al jou skrewe.