lewe het gekom soos 'n dief in die nag
die deur oopgemaak, sonder om te vra
homself as hoof
van jou altaar verklaar
Iewers in 'n koue alleen nag
net duskant Duiwelskloof,
koggel 'n reënmaker lewe
waar hy dolos gooi
en offers bring aan voorvader geeste,
wie se beendere klingel klangel
soos windvangers
in nog 'n hoofstuk van die lewe
in 'n opstal, is kinders se stof bedekte skoene
diep onder katels ingeskuif,
ou houtvloere kraak voor die keldertrap
en uit die onskuld van 'n kinderhart
word vroeër se wiegelied
met grootoog onsekerheid vervang
met net een vraag wat vashaak
soos 'n grammofoonplaat van ouds
'' is my bed hoog genoeg,
weg van die tokkelos se goëlery? ''
Lewe se ongenooide gas
druk swaar op hart en gemoed
waar jy stil berus dat môre
beter sal wees,
ontvlugting lê in die bodem van nog 'n glas
in offer vir wat kan wees
as jy die koord kon sny.
In skynsel en offersang van 'n sekelmaan,
staan ou Sipho wag soos 'n stryder van ouds
voor kinderharte se venster vol drome
en hy sing sy wiegelied
'' slaap sag, slaap soete klein beminde...wees stil
iewers in die sterrenag
waak 'n engel net oor jou ''
BennyB
© 22/07/2012 Barend Booysen