in my oranje blanje blouste land
skryf digters snags by kerse,neon flikkers
lanterns, onder ouglans van die maan,
geboë koepels in 'n woordebos
geketting in slawerny van droefenis,
in die onverganklikheid van liefde
in my Suiderland
skryf digters oor groenigheid op heuwels
wat volroom pram teen grensdrade van die goddelose,
oor die kommunis, die aktivis,
oor misverstande, die bose
in my Afrika
skryf digters met trane van bloed
want kinders kan nie meer lees nie
en oumense is blind van te veel sien,
'n nasie te oud van sukkel
'n taal te jonk om heiligheid te dien
in my vergeteland
skryf digters om ses en twintig letters
wanordelik te rangskik
sodat hierdie land se reënboognasie
aan die vettigheid van woorde kan verstik
in my oranje blanje blouste land
skryf digters snags by kerse,neon flikkers
lanterns, onder ouglans van die maan,
geboë koepels in 'n woordebos
geketting in slawerny van droefenis,
in die onverganklikheid van liefde.
© 2012 Almarie Truter