JERIGO

JERIGO

tussen hier en later
kruip my drome skaam
gebukkend hunkerend
om stilletjies te verken
‘n Leërmag van onsekerheid
gepanser teen gister se verraad
klouter op teen my sterk Jerigo-mure
om die vrees van lief wees
agter klipmure te verskans

is dit werklik moontlik
dat ek ook saggies ongemerk
spore en ‘n rooi merker-merk
in jou seer hart kon bewerk?
kan ek jou troepe innooi
jou in my vesting-stad toelaat
is daar werklik hoop
om my flenter vertroue
met liefdesbeloftes te koop

gaan jy dalk vandag weer
my terreine kom verken
dalk vandag die geheime
van jou liefde aan my toevertrou
is dit vandag die Jerigo-dag
dat jy sewemaal
om my muur gaan loop
gaan jy my dalk vandag
met jou hart vertrou

staan my wagte ewig paraat
om te kyk wie my gaan verraai
om betyds die ramshorings
te blaas sodat ek die stad kan verlaat
vanuit my ommuurde stadstorings
hang ek sku ‘n rooi merker net vir jou
hoopvol oor my veilige Jerigo-muur
en ek wonder of jy dalk vandag
jou liefdesmag gaan stuur

Lizelle 25/05/2011

stunning zany...ek sal altyd hoop dat hy daadie mure kan breek, die een wat dit doen is baie spesiaal ; )

Dit is absoluut my beurt en heeltemal gepas om te kom stilstaan by een van jou verse. Sjoe, hierdie is 'n magiese vers wat met elkeen van ons op unieke wyse sal kan spreek. Lizelle - jy skryf puik, ek hou van die manier wat jy jou gedagtes aanbied en jou woordeskat is net so meesleurend. Ek sien uit na nog baie meer.

Zany,......... hierdie is beslis 'n meesterstuk!!!

Baie dankie vir die lees en die positiewe kommentaar. Ek waardeer dit.

Baie Nice...Uiteindelik

Ek sien net nie 'n vote button hier soos met jou ander gedigte nie ... so ek kan nie vote nie - nie 'n member van die forum nie - nie juis 'n atreklikke om gebruikers vriendelike forum nie - mal oor jou werk en die gedig is awesome

willa by willa dot co dot za

welgedaan!