Stiltes van Onthou

Stiltes waarin eindelose gesprekke deur jou gedagtegang maal
dialoog tussen jou hart en verstand, jou liggaam se sielstaal
Stiltes waarin ek elke oomblik van ons euforiese liefde onthou
sorgelose harte vol vreugde, lag, passie en ook mekaar vertrou
Sagte stiltes van onthou...

Stiltes met stomende bekers koffie in die vroeë oggend se sonlig
ure in pragtige natuurskoon, vars lug en harte vol waardering
Stiltes vol tevredenheid, my hand in joune stap ons die pad aan
oor rivierstroompies, songebakte wildspaadjies vol verstaan
Sagte stiltes van onthou...

Stiltes waar ek langs die strand stap en Skeppingsdaad aanskou
herinneringe aan hoe dit was en al die verlede se foute en verbrou
Stiltes as ek na die melodie van my hart se diepe verlange luister
sagte kleure van verlange en koesterwoorde wat in my oor fluister
Sagte stiltes van onthou...

Stiltes wat afspeel in die dwaalgange van vandag se baie gisters
heimwee vol blou, smagtend na jou siel, als voel sommer flenters
Stiltes vol gister se stukkies van my hart se legkaart wat ek bou
peinsend staar ek in die niet en wonder oor als wat ek verbrou
Sagte stiltes van onthou...

Sagte stiltes wat mens herinner dat mens net mens is...

© Madri Cordier