Die brandhout van jou asem
(Liriek - deur Ammie Moon)
die akoestiek van ou ou lirieke
swymel deur die plankvloer se nate
met kwassiehout wat smeul in woorde
waar dit skuil in somber holtes en gate
in die vuur se vlammespel en knetters
speel die vonkel van jou lag
'n soet refrein wat my laat boemel
deur donker stege van die nag
(koor)
my minnaar-vingers komponeer vir jou 'n rock-ballade
op die klawers van jou lyf
want die brandhout van jou asem laat 'n spoor
waar jy jou liefde teen my hart se mure skryf
skadu's van spikkel-vlerk uile
teken prente op die kamermuur
waar die hitte van die oomblik
gloeiend teen ons lywe skuur
en ek ken lankal reeds die toonleer
die soepel krinkels van jou lyf
waar ek elke nag tot dagbreek
oor krommings van jou rug 'n ballade skryf
(koor)
my minnaar-vingers komponeer vir jou 'n rock-ballade
op die klawers van jou lyf
want die brandhout van jou asem laat 'n spoor
waar jy jou liefde teen my hart se mure skryf
(brug)
witwarm klanke
op rooikool Afrika aarde
dralend in die lawa-buik
van nanag kitare
© 2011 Almarie Truter